Трамп 2026 жылғы әлем чемпионатындағы ең есте қаларлық сәтті атады
АҚШ президенті Дональд Трамп 2026 жылғы футболдан әлем чемпионатындағы ең есте қаларлық сәттердің бірі ретінде АҚШ құрамасының ойыншысы Фоларин Балогунның алаңнан қуылуын атады. Оның сөзін The New York Times басылымы келтірді, деп хабарлайды malimsports.kz.
Трамптың айтуынша, Балогунның қызыл қағаз алған эпизоды «ең есте қаларлық сәт болуы мүмкін».
Балогун Бельгия құрамасымен 1/8 финалдық матчта (1:4) бір ойынға шеттетілуі тиіс болған. Алайда кездесу алдында ФИФА-ның тәртіптік комитеті оның жазасын шартты мерзімге ауыстырған.
Трамп ФИФА президенті Джанни Инфантиноға телефон шалғанын мойындады. Оның айтуынша, ол Инфантиноға ойыншыны алаңға шығаруға қатысты ұсынысын жеткізген.
«Мен Джанниге қоңырау шалып, ұсыныс айттым. “Жігіт ойнасын” дедім. Бірақ шын мәнінде мен нақты не болатынын білмедім. Барлығы өте жақсы аяқталды. Ешқандай дау болған жоқ. Бельгиялықтар жеңді, ал біздің командада барлық ойыншы болды», - деді Трамп.
АҚШ президенті Инфантино Балогунды ойынға жіберу туралы «тағы бір керемет шешім қабылдағанын» айтты. Оның пікірінше, егер футболшы алаңға шықпағанда, АҚШ құрамасы жеңілістің себебін үздік ойыншысының болмауымен түсіндіруі мүмкін еді.
Алайда Джанни Инфантино бұл шешімді тек ФИФА-ның тәуелсіз тәртіптік комитеті қабылдағанын мәлімдеген.
Өз кезегінде ФИФА басшысы Дональд Трампқа әлем чемпионатының «керемет табысына» үлес қосқаны үшін алғыс білдірді.
Әлем чемпионатының финалы 19 шілдеде Нью-Джерси штатындағы Ист-Ратерфорд қаласында орналасқан «MetLife» стадионында өтеді. Шешуші кездесуде Аргентина мен Испания құрамалары чемпиондық атақ үшін таласады.
Фото: Getty Images
"Мбаппеге үлкен соққы": Моуринью "Реал Мадридтің" танымал ойыншысын сатуға ниетті
Ең көп оқылған
