Футболдан әлем чемпионатының топтық кезеңіндегі Жапония – Нидерланд матчы аяқталған соң жапон жанкүйерлері стадиондағы трибуналарды тазалап шықты, деп хабарлайды malimsports.kz.
Даллас қаласында өткен ойын 2:2 есебімен тең аяқталды. Кездесуден кейін көрермендер орындарында қалған қоқысты арнайы қапшықтарға жинап, секторларды мұқият тазартты.
Бұл көрініс FIFA-ның ресми X парақшасында жарияланды. Онда жапон жанкүйерлерінің өздерімен бірге қоқыс салатын пакеттер әкеліп, стадионды таза күйде қалдырғаны көрсетілген.
Жанкүйерлердің бірі бұл әрекетті түсіндіріп, мұның мәдени дәстүр екенін атап өтті:
Біз жапондықтармыз, сондықтан отырған орнымызды таза қалдыру – құрмет белгісі, – деді ол.
Айта кетейік, мұндай жағдай жапон жанкүйерлері үшін жаңалық емес. Бұған дейін де олар әлем чемпионаттарында және өзге халықаралық матчтарда стадиондарды жинап кетіп, көпшіліктің ықыласына ие болған.
Фото: FIFA-ның X парақшасы
