Канада әлем чемпионатында тарихи жеңіске жетіп, бірнеше рекордты жаңартты
Футболдан 2026 жылғы әлем чемпионатының топтық кезеңіндегі екінші турда Канада ұлттық футбол құрамасы өз тарихындағы ең жарқын ойындардың бірін өткізді, деп хабарлайды malimsports.kz.
Алаң иелері Қатар құрамасын 6:0 есебімен ойсырата жеңіп, бірден бірнеше тарихи көрсеткішке қол жеткізді. Кездесу Ванкувердегі Би-Си Плэйс стадионында өтті. Матч соңына қарай Қатар құрамасының екі ойыншысы тәртіп бұзып, қызыл қағазбен алаңнан қуылды.
Бұл нәтиже Канада құрамасы үшін ерекше маңызға ие болды. Канадалықтар әлем чемпионаттары тарихындағы алғашқы жеңісіне қол жеткізді. Бұған дейін олар әлем біріншілігіне екі рет қатысқанымен, жеңіске жете алмаған еді.
Статистикалық мәліметтерге сәйкес, Джесси Марш жаттықтыратын команда алғашқы таймның өзінде қарсылас қақпасына сегіз дәл соққы бағыттаған. Осылайша Канада соңғы 32 жыл ішінде әлем чемпионатында мұндай нәтижеге жеткен алғашқы құрама атанды. Бұған дейін дәл осындай көрсеткіш 1994 жылы Румыния құрамасының Аргентинаға қарсы матчында тіркелген болатын.
Канада тағы бір ерекше рекорд орнатты – команда қарсылас айып алаңында допқа 97 рет иелік еткен. Бұл көрсеткіш әлем чемпионаттарында статистика жүргізіле бастаған 1966 жылдан бергі ең үздік нәтиже саналады. Бұған дейінгі рекорд Германия құрамасына тиесілі болған.
Ойын барысында канадалықтар жалпы 32 соққы жасап, допқа иелік ету деңгейін 79 пайызға дейін жеткізді. Мұндай көрсеткішке әлем чемпионаттары тарихында бұған дейін ешбір команда қол жеткізбеген.
Сондай-ақ Канада Еуропа мен Оңтүстік Америкадан тыс аймақ құрамалары арасында әлем чемпионаты матчында бес голдан көп соққан алғашқы команда ретінде тарихқа енді.
Осы жеңіс арқылы Канада XXI ғасырдағы әлем чемпионатын қабылдаушы елдер арасындағы ең ірі жеңістердің авторы атанды. Бұған дейінгі үздік нәтиже 2018 жылы Ресей құрамасының Сауд Арабиясын 5:0 есебімен жеңген кездесуінде тіркелген еді.
Фото: ©instagram.com/canadasoccer/
Футзалдан Қазақстан құрамасы ӘЧ-2028 іріктеу кезеңінің жеребесінде бірінші себетке түсті
Ең көп оқылған
