Әлем чемпионатының финалын басқарған Славко Винчич төрешілік мансабын аяқтады
Футболдан әлем чемпионатының финалдық матчын басқарған словениялық төреші Славко Винчич кәсіби мансабын аяқтайтынын мәлімдеді. Бұл туралы Словения футбол одағының баспасөз қызметі хабарлады, деп жазады malimsports.kz.
46 жастағы төреші 19 шілдеде өткен Испания мен Аргентина құрамалары арасындағы әлем чемпионатының финалында қызмет атқарды. Қосымша уақытта аяқталған кездесуде Испания 1:0 есебімен жеңіске жетіп, әлем чемпионы атанды.
Финал барысында Винчич екінші таймның соңында Аргентина құрамасының жартылай қорғаушысы Энцо Фернандеске екінші сары қағаз көрсетіп, алаңнан қуды. Сондай-ақ қосымша уақытта VAR жүйесінің көмегімен Микель Мериноның Николас Отамендиге қарсы ереже бұзғаны анықталып, Испанияның соққан бір голы есепке алынбады.
Славко Винчич әлем чемпионатында жалпы төрт матчқа төрелік етті. Турнир қорытындысы бойынша ол Халықаралық футбол тарихы және статистикасы федерациясы (IFFHS) тарапынан 2026 жылғы әлем чемпионатының үздік төрешісі деп танылды.
Словениялық маман 2010 жылдан бері ФИФА дәрежесіндегі төреші болды. Ол Еуропа чемпионаттарының 2020 және 2024 жылғы финалдық кезеңдерінде, сондай-ақ 2022 жылғы Катардағы әлем чемпионатында матчтарды басқарған.
Бұған дейін Винчич 2022 жылғы Еуропа лигасының финалында франкфурттік «Айнтрахт» пен «Рейнджерс» арасындағы кездесуге, ал 2024 жылы мадридтік «Реал» дортмундтық «Боруссияны» 2:0 есебімен жеңген Чемпиондар лигасының финалына төрелік еткен болатын.
Осылайша, әлемдік футболдағы ең тәжірибелі төрешілердің бірі саналатын Славко Винчич ұзақ жылғы халықаралық мансабын аяқтады.
Фото: Getty Images
"Мбаппеге үлкен соққы": Моуринью "Реал Мадридтің" танымал ойыншысын сатуға ниетті
Ең көп оқылған
