Әлем чемпионаттарында кім үздік: Месси ме, әлде Роналду ма?

2026 жылғы футболдан әлем чемпионаты аяқталды. Бұл турнир 41 жастағы Криштиану Роналду үшін соңғы мундиаль болса, 39 жастағы Лионель Месси үшін де әлем чемпионатындағы соңғы жарыс болуы ықтимал. Екі футбол аңызы да әлем чемпионаттарына алты рет қатысып, тарихи рекорд орнатты. Бірақ олардың мундиальдағы жетістіктері бірдей емес, деп жазады malimsports.kz. 

Лионель Месси 2022 жылы Аргентина құрамасымен әлем чемпионы атанып, мансабындағы ең басты трофейді жеңіп алды. Ол бұған дейін 2014 жылы да финалға шыққанымен, Германияға есе жіберген еді. Ал 2026 жылы Аргентина тағы да финалға дейін жетіп, шешуші кездесуде Испаниядан 0:1 есебімен жеңілді.

Осылайша, Месси әлем чемпионатының үш финалында ойнаған тарихтағы екінші футболшы атанды. Бұған дейін мұндай жетістікке тек бразилиялық Кафу ғана қол жеткізген.

Ал Криштиану Роналдудың әлем чемпионатындағы ең жоғары жетістігі – 2006 жылғы жартылай финал. Сол турнирде Португалия Франциядан жеңіліп, финалға шыға алмады.

Голдар статистикасы

Әлем чемпионаттары тарихында Лионель Месси 33 матчта 21 гол соғып, барлық уақыттың үздік сұрмергендерінің біріне айналды. 2026 жылғы турнирде ол 8 гол соғып, әлем чемпионаттары тарихындағы ең үздік мерген атанды.

Криштиану Роналду болса мундиальдарда 27 матчта 11 гол соқты. 2026 жылғы әлем чемпионатында ол үш рет мергендік танытып, өз көрсеткішін жақсартты. Сонымен қатар португалиялық футболшы алты әлем чемпионатының барлығында гол соққан тарихтағы алғашқы ойыншы ретінде рекорд орнатты.

Рекордтар мен тарихи жетістіктер

Месси әлем чемпионаттарында үш дубль мен бір хет-трик авторы атанса, Роналдудың еншісінде бір дубль және бір хет-трик бар. Аргентиналық шабуылшы 2026 жылғы турнирде әлем чемпионаттары тарихындағы ең егде жастағы хет-трик авторы атанып, бұл көрсеткіш бойынша Роналдудың рекордын жаңартты.

Ал Роналду 41 жасында гол соғып, әлем чемпионаттары тарихындағы ең егде жаста гол соққан екінші футболшы атанды.

Плей-оффтағы көрсеткіш

Месси плей-офф кезеңінде жалпы 17 матч өткізіп, шешуші ойындарда бірнеше мәрте командасына жеңіс сыйлады. 2026 жылғы әлем чемпионатының ширек финалы мен жартылай финалында гол соқпаса да, үш нәтижелі пас беріп, команданың финалға шығуына үлес қосты.

Роналду болса плей-офф кезеңіндегі алғашқы голын тек 2026 жылы Хорватияға қарсы 1/16 финалда соқты. Алайда келесі кезеңде Испанияға қарсы ойында көзге түсе алмай, Португалия жарыстан шығып қалды.

Жеке марапаттар

Лионель Месси екі рет – 2014 және 2022 жылдары әлем чемпионатының үздік ойыншысы атанды. Бұл – Роналдудың қолы жетпеген марапат.

Ал 2026 жылғы әлем чемпионатының үздік сұрмергені француз шабуылшысы Килиан Мбаппе болды. Сондықтан Месси де, Роналду да мансабында әлем чемпионатының «Алтын бутсасын» иеленген жоқ.

Әлем чемпионаттарындағы көрсеткіштерді салыстырсақ, Лионель Месси Роналдудан айқын басым. Ол әлем чемпионы атанып, үш финалда ойнады, көп гол соқты және екі мәрте турнирдің үздік ойыншысы атанды. Ал Криштиану Роналду алты мундиальға қатысып, бірегей рекордтар орнатқанымен, әлем чемпионатының басты жүлдесін жеңіп ала алмады. Осылайша, мундиаль тарихындағы жетістіктер тұрғысынан басымдық Мессидің жағында.

Фото: Getty Images