Денис Евсеев Пәкістандағы турнирдің финалына шықты

Қазақстандық теннисші Денис Евсеев Пәкістанның Исламабад қаласында өтіп жатқан челленджер турнирінің жұптық сынында финалға жолдама алды.

Чехиялық серіктесі Доминик Паланмен қос жұп ретінде жарыстың 4-ракеткасы саналған Евсеев жартылай финалда америкалық Пристон Браун мен украиналық Никита Белозертцев дуэтін сенімді түрде ұтты.

Алғашқы сетте қазақстандық-чехиялық жұп қарсыластарын қиналтпай, 6:1 есебімен басым болды. Екінші партияда Браун–Белозертцев жұбы қарсылық танытқанымен, Евсеев пен Палан матчты 7:5 есебімен аяқтап, финалға шықты.

Бір сағатқа жетпейтін уақытқа созылған кездесуде Евсеев–Палан жұбы эйс жасамағанымен, ұсынылған 8 брейк-пойнттың жетеуін сәтті пайдаланған. Ал қарсыластары 1 эйс жасап, 3 брейкке қол жеткізген (6 брейк-пойнт).

Финалда олар жергілікті фавориттер – пәкістандық Айсам-уль-Хак Куреши мен Музаммил Муртазамен чемпиондық атаққа таласады.

Сонымен қатар, сенбі күні Денис Евсеев жекелей сында да кортқа шығып, әлемнің 473-ракеткасы саналатын түркиялық Мерт Алкаямен финал жолдамасы үшін күш сынасады.

Фото: ҰОК