Australian Open турнирінде рекордтық жүлде қоры төленеді
Теннис қауымдастығы Австралия 2026 жылы өтетін Australian Open турнирінің жүлде қоры рекордтық деңгейге жеткенін мәлімдеді, деп хабарлайды malimsports.kz.
Маусымдағы алғашқы «Үлкен дулыға» турниріне қатысатын теннисшілер арасында жалпы 111,5 млн австралиялық доллар (шамамен 74,89 млн АҚШ доллары) бөлінеді. Бұл өткен жылмен салыстырғанда 16 пайызға көп.
Tennis Australia ұйымының бас директоры Крейг Тайлидің айтуынша, жүлде қорының артуы теннисті барлық деңгейде дамытуды көздейді. Әсіресе іріктеу кезеңдеріндегі сыйақыларға ерекше көңіл бөлінген. 2023 жылдан бері квалификациядағы жүлде мөлшері 55 пайызға өскен.
Бұл инвестициялар теннистің берік негізін қалыптастырып, оның ұзақ мерзімді дамуы мен коммерциялық өсуіне ықпал етеді. Барлық деңгейдегі ойыншыларды қолдау арқылы біз жаңа таланттардың қалыптасуына және жанкүйерлер үшін қызықты бәсекенің артуына жағдай жасаймыз, - деді Крейг Тайли.
Ең жоғары өсім (19%) жекелей сында чемпион атанатын ойыншыларға тиесілі. Ерлер мен әйелдер арасындағы жеңімпаздар 2,79 млн доллардан алады. Финалистерге - 1,44 млн доллар, жартылай финалға шыққандарға - 840 мың доллар, ал ширек финалистерге - 504 мың доллардан төленеді.
Іріктеу кезеңіндегі жүлделер де 16 пайызға ұлғайды. Үшінші айналымға шыққандар 56 мың доллар, екінші айналымға - 38,3 мың доллар, бірінші айналымға - 27,2 мың доллар алады.
Australian Open іріктеу ойындары 12 қаңтарда басталады. Ал негізгі турнир 18 қаңтар мен 1 ақпан аралығында Мельбурн қаласында өтеді. Өткен маусымда турнирде италиялық Янник Синнер мен америкалық Мэдисон Киз жеңімпаз болған еді.
Фото: Янник Синнер/Getty Images/
Станимир Стоилов: Қазақ футболының мәселесі тек ұлттық құрамада емес
Ең көп оқылған
