Қазақстанның жұптық сындағы бірінші нөмірі, әлемнің 14-ракеткасы Анна Данилина Аустралия ашық чемпионатының үшінші айналымына жолдама алды, деп хабарлайды malimsports.kz.
Жарыста 7-ракетка болып тіркелген Анна Данилина сербиялық Александра Круничпен бірге екінші айналымда аустралиялық жұп – бұрын Ресей атынан өнер көрсеткен Дарья Касаткина мен Арина Родионованы жеңді.
Қазақстандық-сербиялық дуэт қарсыластарынан 6:3, 6:4 есебімен басым түсті.
Шамамен бір жарым сағатқа созылған кездесуде Данилина мен Крунич 2 эйс жасап, 12 брейк-пойнттың алтауын тиімді пайдаланды. Ал Касаткина мен Родионова 1 эйспен шектеліп, 8 брейк-пойнттың тек үшеуін ғана сәтті жүзеге асырды.
Анна Данилина мен Александра Круничтің үшінші айналымдағы қарсыластары кейін белгілі болады.
Фото: ҚТФ
