Қазақстандық жас теннисші Асылжан Арыстанбекова Анталияда (Түркия) өтіп жатқан ITF W15 санатындағы турнирде жартылай финалға шықты, деп хабарлайды malimsports.kz.
Қазіргі таңда WTA рейтингінде 1293-орында тұрған 19 жастағы спортшы ширек финалда марокколық Диае Эль-Жардимен (1103-орын) кортта кездесті.
Қарсыласының рейтингі жоғары болғанына қарамастан, Асылжан бұл матчта толық басымдық көрсетті. Ол алғашқы сетте бірде-бір гейм бермей, 6:0 есебімен айқын жеңіске жетті. Екінші партияда да қарқынын бәсеңдетпей, ойынды 6:2 нәтижесімен аяқтады.
Финал жолдамасы үшін Арыстанбекова румыниялық, 16 жастағы Сара Виктория Баланмен (1262-орын) күш сынасады.
Сондай-ақ Асылжан отандасы Іңкәр Дүйсебаймен бірге жұптық сында да жартылай финалға шықты. Қазақстандық дуэт марокколық Диае Эль-Жарди мен румыниялық Мария Сара Попаға қарсы матчта жеңіске жетсе, турнир финалына жолдама алады.
Фото: ҚТФ
