Аңызға айналған Уильямстар Цинциннати турнирінде жұптық сында өнер көрсетеді
Әлемдік теннистің аңыздары – америкалық Серена мен Винус Уильямс ұзақ үзілістен кейін қайтадан жұптық сында бірге өнер көрсетеді. Белгілі теннисшілер АҚШ-тың Цинциннати қаласында өтетін WTA-1000 санатындағы турнирге арнайы шақырту (wild card) алып, бір команда құрамында бақ сынамақ, деп жазады malimsports.kz.
Бұл – апалы-сіңлілі Уильямстардың 2022 жылғы US Open турнирінен кейінгі алғашқы бірлескен жарысы болмақ. Сонымен қатар Винус Уильямс жекелей сындағы негізгі кезеңге де арнайы шақырту алды.
Бұған дейін қос теннисші 2026 жылғы Уимблдон турнирінде бірге ойнауды жоспарлаған еді. Алайда Серена Уильямс тізесінен алған жарақатына байланысты жарыстан бас тартуға мәжбүр болды.
44 жастағы Серена Уильямс биыл кәсіби мансабын қайта жалғастырды. «Үлкен дулыға» турнирлерінің 23 дүркін чемпионы 2022 жылдан кейін алғаш рет жекелей сында Уимблдонда кортқа шығып, алғашқы айналымда австралиялық Майя Джойнтқа есе жіберді. Сол кездесуде ол тізесін жарақаттап алған болатын.
Ал 46 жастағы Винус Уильямс – «Үлкен дулыға» турнирлерінің жеті дүркін жеңімпазы әрі төрт дүркін Олимпиада чемпионы. Жақында ол ресейлік Диана Шнайдермен жұп құрып, Вашингтондағы WTA-500 турнирінің ширек финалына дейін жетті.
Жұптық сында Уильямс апалы-сіңлілері әлемнің бірінші ракеткалары атанған. Олар бірге 14 «Үлкен дулыға» титулын жеңіп алып, үш Олимпиада ойындарының алтын медалін еншілеген.
Айта кетейік, Цинциннатидегі WTA-1000 турнирі 13–23 тамыз аралығында өтеді. Теннис жанкүйерлері аңызға айналған қос спортшының корттағы кезекті өнерін тағатсыздана күтіп отырған жайы бар.
Фото: Getty Images
"Мбаппеге үлкен соққы": Моуринью "Реал Мадридтің" танымал ойыншысын сатуға ниетті
Ең көп оқылған
