Қазақстандық аралас жекпе-жек спортшысы Шавкат Рахмонов енді UFC-дің барлық салмақ дәрежелері бойынша үздік 15 жауынгерінің қатарында жоқ, деп хабарлайды malimsports.kz.
Бұл жағдай Бразилияның Рио-де-Жанейро қаласында UFC жеңіл салмақтағы бұрынғы чемпионы Чарльз Оливейра қатысқан турнирден кейін тіркелді.
Оливейра өз елінде Матеуш Гамротты жеңді, бұл жеңіс оған UFC-дегі үздік 15 спортшы қатарына кіруге мүмкіндік берді.
Ал Шавкат Рахмонов P4P рейтингісінде соңғы бірнеше ай бойы 15-орында тұрғанымен, енді бұл тізімнен шығып қалды. Бұл оның жыл басынан бері жекпе-жекке шықпағандығымен байланысты, өйткені мамыр айында ауыр жарақатына ота жасатқан еді.
Дегенмен, UFC-дің жартылай орта салмақ дәрежесіндегі рейтингте Рахмонов үздік үштіктен шыққан жоқ.
Отандасымыз мансабында 19 рет шығып, барлығында жеңіске жеткен.
Фото: shavkatrakhmonov94 / Instagram
