Қазақстандық танымал файтер Қуат Хамитов әлемдегі ең беделді жұдырықтасу ұйымдарының бірі – Bare Knuckle Fighting Championship (BKFC) лигасынан жекпе-жек өткізу туралы ұсыныс алғанын мәлімдеді, деп жазады malimsports.kz.
«BKFC ұйымынан ұсыныс алдым. Егер келісімшарттың талаптары бойынша ортақ шешімге келсек, күзде мен үшін жаңа ұйымда өнер көрсетемін», – деп жазды спортшы әлеуметтік желідегі парақшасында.
BKFC (Bare Knuckle Fighting Championship) – жалаң жұдырықпен өтетін жекпе-жектерді ұйымдастыратын әлемдегі ең ірі промоушен. АҚШ-тың Филадельфия қаласында орналасқан ұйым 2018 жылы құрылған. Ол 1889 жылдан бері АҚШ-та ресми түрде жалаң жұдырық боксы турнирлерін өткізуге лицензия алған алғашқы компания саналады.
Соңғы жылдары BKFC-де ММА мен кәсіпқой бокстың көптеген танымал спортшылары өнер көрсетіп келеді.
Айта кетейік, осы айда Қуат Хамитов RAF ұйымында алғаш рет белдесіп, еркін күрес ережесі бойынша UFC-дің үздік файтерлерінің бірі Арман Царукянмен кездескен еді. Бұл жекпе-жекте қазақстандық спортшы жеңіліске ұшырады.
Осыдан кейін Хамитов әйгілі қарсыласымен реванш өткізуге дайын екенін айтып, тағы бір жекпе-жек ұйымдастыруды ұсынған болатын.
Фото: Ашық дереккөзден
