"Барыс" мәскеулік "Динамодан" басым түсті
«Барыс» жаңа маусымдағы алғашқы өз алаңындағы сериясын мәскеулік «Динамомен» өткізген кездесумен аяқтады, деп хабарлайды malimsports.kz.
Медициналық себептерге байланысты Тайс Томпсон матчқа қатыспады. Шабуыл шебінде астаналықтардың құрамында КХЛ дебютанты Владимир Волков пен негізгі команда сапында тұрақты біріншіліктегі алғашқы ойынын өткізген Батырлан Муратов шықты. Ал екінші қорғаныс жұбына жарақаттан жазылып, қайта қатарға қосылған Иэн Маккошен оралды.
Бірінші кезең қонақтардың пайдасына өрбіді, олар есепті небәрі 40 секундта ашты. Максим Комтуа көк сызықтан жасалған соққыдан кейін шайбаны қақпаға бағыттады. Үзіліске дейін «Барыстың» есепті теңестіруге жүз пайыздық мүмкіндігі болды, алайда Динмухамед Қайыржан қақпашы Максим Моторыгинмен бетпе-бет шығып, өз мүмкіндігін пайдалана алмады.
Екінші жиырма минуттықтың басында алаң иелеріне артықшылық көмектесіп, Ансар Шайхмедденов Алихан Омирбековтің тамаша пасынан кейін нысананы дәл көздеді. Ал кезең соңына қарай Вячеслав Колесников КХЛ-дегі алғашқы голын соғып, «5-ке 3» форматында ерекшеленді.
Үшінші кезеңнің ортасында Никита Гусев бұрылып соққан шайбасымен Андрей Шутовты екінші рет қапы қалдырды. Дегенмен қазақстандықтар жауап ретінде екі мәрте гол соқты. Майкл Веккьоне қарсыластардың ереже бұзушылығын тағы да тиімді пайдаланды, ал көп ұзамай оның пасынан кейін Омирбеков көзге түсті. Матчтағы соңғы нүктені «Барыстың» 88-нөмірі қойды - шайба «Динамоның» бос қақпасына енді. Бұл голда Шутовтың өзі де нәтижелі пас берушілер қатарында болды.
Енді 18 қыркүйекте Михаил Кравецтің ойыншылары Магнитогорскіде «Металлургпен» кездеседі.
«Барыс» - «Динамо» Мәскеу 5:2 (0:1, 2:0, 3:1)
0:1 – 00:40 – Комтуа (Классон, Мамин)
1:1 – 24:29 – Шайхмедденов (Омирбеков, Савицкий) АГ
2:1 – 37:24 – Колесников (Уолш, Веккьоне) АГ
2:2 – 47:00 – Гусев (Броссо)
3:2 – 50:38 – Веккьоне (Галимов, Уолш) АГ
4:2 – 56:00 – Омирбеков (Веккьоне)
5:2 – 58:33 – Веккьоне (Бреус, Шутов)
Қақпашылар: Шутов – Моторыгин.
Фото: "Барыс" ХК
Балауса Мұздыман "Қайрат" пен "Реал Мадрид" кездесуіне болжам жасады
Ең көп оқылған
