«Сынған қолымен чемпион атанды»: Сәкен Бибосыновтың жанкештілігі көпшілікті таңғалдырды
Токио Олимпиадасының жүлдегері, ел мақтанышы Сәкен Бибосынов Семейде өткен Қазақстан чемпионатында ауыр жарақат алғанына қарамастан, жарысты жалғастырып, жеңіске жеткен. Бұл туралы спорт журналисі Аслан Қаженов әлеуметтік желіде жазды.
Журналистің айтуынша, боксшы жарыс барысында оң қолын сындырып алған. Соған қарамастан Бибосынов рингке қайта оралып, ақтық сынға дейін жетіп, ел чемпионы атанған.
«Сәкен Бибосыновтың оң қолын бинтпен орап, жаттығып жүрген видеосын көрдім. Бұл жарақат Семейде өткен Қазақстан чемпионатында алынды. Финалға дейінгі айқастарда сындырып алған еді. Соған қарамастан Сәкен жарысты жалғастыратынын айтты. Сылтау айтқан жоқ, жарыстан шыққан жоқ. Сол қайсар мінездің арқасында ел үздігі атанды», – деп жазды Қаженов.
Журналист Бибосыновтың төрт күннен кейін ғана кәсіби бокста қайта шаршы алаңға шығып, тағы бір мәрте жеңіске жеткенін айтты.
«Мұндай табандылық сирек кездеседі. Бұған дейін Серік Сәпиев пен Бақтияр Артаевтың да жарақатпен өнер көрсеткенін естіп едім. Сәкеннің қайсар мінезі талайды таңғалдыруда», – дейді ол.
Қаженов спортшының бар ауырлықты үнсіз көтеріп, жаттығуын тоқтатпай келе жатқанын атап өтіп, қоғамды қолдауға шақырды.
«Сын сағатында сынбай, тәуекелге барып айқасатын спортшылар өте аз. Осындай жанкештілікке бара алатын батырларымызды бағалайық. Сәкенге тез жазылып, толық қалпына келуді тілейміз!» – деп жазды ол.
Сәкен Бибосынов туралы
51 келі салмақ дәрежесінде өнер көрсетеді
2020 Токио Олимпиадасының қола жүлдегері
2021 жылғы әлем чемпионы (Сербия)
2025 жылғы ел чемпионатының жеңімпазы
Париж Олимпиадасына лицензия иегері
Жанкүйерлер спортшының жарақатына қарамастан, ел намысын биік қойғанына ризашылығын білдіріп, тез сауығып кетуіне тілектес.
Фото: ҰОК
"Барлығына ұнау мүмкін емес": Шерхан Қалмұрза "сыншылар" туралы пікір білдірді
Ең көп оқылған
