«Қазақ королі» әлем чемпионы атағына бір қадам жақын
Екінші жартылай жеңіл салмақта өнер көрсететін қазақстандық боксшы Сұлтан Зауырбек (20-0, 13 KO) IBF нұсқасы бойынша әлем чемпионы атағына үміткер атану жолындағы жекпе-жекке қатысты мәлімдеме жасады.
Бұған дейін Халықаралық бокс федерациясы (IBF) Сұлтан Зауырбек пен австралиялық боксшы Лиам Уилсон (17-3, 9 KO) арасында іріктеу жекпе-жегін өткізу туралы шешім қабылдаған еді. Бұл кездесудің жеңімпазы қазіргі әлем чемпионы – мексикалық Эдуардо Нуньеске (29-1, 27 KO) қарсы титулдық айқасқа міндетті үміткер атанады.
Сұлтан Зауырбектің айтуынша, шешуші іріктеу жекпе-жегі 2026 жылдың ақпан айында Австралияда өтеді.
«2026 жылдың ақпан айында IBF титулы бойынша финалдық жекпе-жекке Австралияда шығамын. Бұл айқаста жеңіске жеткен боксшы әлем чемпионы атағы үшін қазіргі белдік иегері мексикалық Эдуардо Нуньеспен жұдырықтасады», – деді Сұлтан Qazsport телеарнасына берген сұхбатында.
Сұлтан Зауырбек соңғы рет 5 сәуірде Астанада рингке шықты. Ол бұл кездесуде Оңтүстік Африка Республикасының боксшысы Азинга Фузилені (18-3, 12 KO) төрешілердің бірауыздан шешімімен жеңіп, IBF Inter-Continental белбеуін иеленді.
Қазіргі таңда Сұлтан Зауырбек IBF рейтингінде 5-орында, ал оның болашақ қарсыласы Лиам Уилсон 8-орында тұр. Сонымен қатар қазақстандық боксшы WBA нұсқасы бойынша екінші орынға жайғасқан.
Егер Зауырбек алдағы іріктеу жекпе-жегінде жеңіске жетсе, ол Қазақстан боксы тарихындағы кезекті әлем чемпионы атану мүмкіндігіне ие болады.
Фото: x.com/SultanZaurbek
Станимир Стоилов: Қазақ футболының мәселесі тек ұлттық құрамада емес
Ең көп оқылған
