Назым Қызайбай құрамадан уақытша «шеттетілді»
Қазақстан әйелдер құрамасының бас бапкері Елдос Сайдалин алдағы Әлем кубогының финалына дайындық барысы мен команда құрамындағы өзгерістер туралы мәлімдеді.
Әлем кубогының финалы 2025 жылғы 17–22 қараша аралығында Үндістанның Нью-Дели қаласында өтеді. Бас бапкердің шешімі бойынша, Ливерпульде өткен 2025 жылғы әлем чемпионатының жеңімпаздары мен жүлдегерлері бұл жарысқа қатыспайды.
«Бізде 1-14 қараша аралығында оқу-жаттығу жиыны өтеді. Үндістанда өтетін Әлем кубогының соңғы кезеңіне әр салмақ дәрежесінен үш спортшыдан дайындаймыз. Барлығы бес үздік боксшы ел намысын қорғайды», - деді Елдос Сайдалин.
Сонымен қатар бапкер әлем чемпионатында өнер көрсеткен спортшыларға демалыс берілгенін атап өтті:
«Олар бұл жиынға қатыспайды. Желтоқсан айынан бастап қайта жаттығу процесіне қосылады», - деді ол.
Ливерпульде өткен 2025 жылғы әлем чемпионатында Қазақстан әйелдер құрамасы жалпыкомандалық есепте бірінші орын иеленді.
Чемпиондар:
Алуа Балқыбекова
Аида Әбікенова
Наталья Богданова
Жүлдегерлер:
Назым Қызайбай – күміс жүлде
Виктория Графеева – қола жүлде
Елдана Тәліпова – қола жүлде
Айта кетейік, әлем чемпионатының жеңімпаздары мен жүлдегерлері қазан айында Семейде өткен Қазақстан чемпионатына да қатысқан жоқ.
Бас бапкердің айтуынша, қазіргі мақсат – жас құраммен жұмыс істеп, жаңа спортшыларға халықаралық деңгейде тәжірибе жинауға мүмкіндік беру.
Фото: ҚФБ
"Барлығына ұнау мүмкін емес": Шерхан Қалмұрза "сыншылар" туралы пікір білдірді
Ең көп оқылған
