Қазақстан құрамасының жарық жұлдызы Санжар Тәшкенбай Испанияда өтіп жатқан Boxam Elite-2026 халықаралық турнирінде жанкүйерлер назарын өзіне аударды.
Испания бокс федерациясының баспасөз қызметі Instagram желісінде жариялаған видеода қазақстандық боксшының алғашқы жекпе-жектегі шеберлігі ерекше атап өтілді. Кадрларда Тәшкенбайдың үндістандық қарсыласына қарсы айқын жылдамдық басымдығын пайдаланып, күтпеген әрі дәл соққы жасаған сәті көрсетілген.
Испаниялықтар бұл эпизодты: «Тәшкенбайдан тосын сый» деп сипаттады.
50 келіге дейінгі салмақ дәрежесінің ширек финалында Санжар Тәшкенбай Үндістан өкілі Риши Сингхпен қолғап түйістірді. Үш раунд қорытындысы бойынша төрешілердің бөлек шешімімен қазақстандық боксшы 4:1 есебімен жеңіске жетті.
Осылайша Тәшкенбай турнирдің жартылай финалына өтіп, кем дегенде қола жүлдені алдын ала қамтамасыз етті.
Санжар Тәшкенбай – соңғы жылдары Қазақстан боксының ең тұрақты әрі нәтижелі спортшыларының бірі. Оның жетістіктері қатарында:
2025 жылғы әлем чемпионы (World Boxing нұсқасы бойынша)
2023 жылғы әлем чемпионы (IBA нұсқасы бойынша)
2022 жылғы Азия чемпионы
2024 жылғы Азия чемпионатының күміс жүлдегері
Айта кетейік, Boxam Elite-2026 турнирі 3-8 ақпан аралығында Испанияның Ла-Нусия қаласында өтуде. Қазақстан бұл жарысқа ерлер және әйелдер құрамасымен қатысып жатыр.
Фото: olympic.kz
