Қазақстандық боксшы Әділет Құрметов Ресейдің Екатеринбург қаласында өткен RCC HARD One Round жалаң қолмен жұдырықтасу лигасының іріктеу Гран-приінде жеңіске жетті, деп хабарлайды malimsports.kz.
Финалда ол «Индеец» лақап атымен танымал Ұлқан Шодибековпен кездесіп, қарсыласын нокаутпен жеңді.
Бұл – Құрметов үшін бір кештегі үшінші жекпе-жегі болатын. Кездесу барысында қазақстандық спортшы ауыр нокдаун алғанымен, жекпе-жекті жалғастырып, айқасты өз қолына алды. Нәтижесінде жекпе-жектің 1 минут 39-секундында қарсыласын нокаутқа жіберіп, турнир чемпионы атанды.
Осы жеңістің арқасында Әділет Құрметов RCC HARD ұйымымен келісімшартқа қол қойды.
Айта кетейік, Әділет Құрметов – әуесқой бокстан 60 келіде Қазақстанның үш дүркін чемпионы.
Сондай-ақ ол 2021-2024 жылдар аралығында кәсіпқой рингте үш жекпе-жек өткізіп, барлығында жеңіске жеткен.
Фото: Данияр Майлыбаев
