Бокстан Қазақстан мен Өзбекстан құрамаларының бас бапкерлері бірлесіп мәлімдеме жасады
Ливерпульде бокстан өткен алғашқы World Boxing әлем чемпионаты аяқталып, Қазақстан мен Өзбекстан құрамалары тарихи жетістікке қол жеткізді, деп хабарлайды malimsports.kz.
Жарыс соңында қос мемлекеттің бас бапкерлері – Қазақстан құрамасының тізгінін ұстаған Қайрат Сатжанов пен Өзбекстан командасының жаттықтырушысы Толқын Киличев бір-біріне жылы лебіздерін білдіріп, достық ниеттерін жеткізді. Желіде тараған бейнежазбада бапкерлер бірін-бірі жоғары нәтиже үшін құттықтап, алдағы жарыстарға сәттілік тіледі.
«Құрметті жанкүйерлер, бізді жеңіспен құттықтаңыздар. Өзбекстан мен Қазақстан – бауырлас халықтар, біз әрқашан бірге боламыз. Тіпті үлкен басшыларымыз әзілдеп: “Неге Англияға келдіңдер? Үйлеріңде-ақ спарринг жасап, қалған жүлделерді өзара бөліп алсаңдар болар еді”, – деді. Екі елдің спортшылары әрдайым жоғары деңгейде өнер көрсетсін», - деді ҚР ұлттық құрамасының бас бапкері Қайрат Сатжанов.
Ал Өзбекстан құрамасының бас бапкері Толқын Киличев болса екі боксшылары рингтен тыс уақытта сыйлас екенін алға тартты.
«Қазақстан мен Өзбекстан — рингте қарсылас, ал рингтен тыс — бір-бірін құрметтейтін бауыр елдер. Алла қаласа, Олимпиадада да жақсы нәтиже көрсетеміз. Баршаңызға денсаулық, сәттілік тілеймін», - деді Толқын Киличев.
Қазақстан құрамасы World Boxing ұйымы өткізген алғашқы әлем чемпионатын аса сәтті аяқтады. Жерлестеріміз 7 алтын, 1 күміс және 2 қола медаль жеңіп алып, жалпыкомандалық есепте топ жарды.
Өзбекстан құрамасы да жоғары нәтиже көрсетті — 6 алтын, 2 күміс және 3 қола медальмен екінші орынды иеленді.
Қазақстан мен Өзбекстан — қазіргі таңда әуесқой бокстағы ең мықты бәсекелестердің қатарында. Әсіресе, Париж-2024 Олимпиадасынан кейін (Қазақстан – 1 күміс, Өзбекстан – 5 алтын), жанкүйерлер әр жарыстағы нәтижелерді салыстыра қарап келеді. Бұл екі ел арасындағы бәсеке – спорттағы бәсеке ғана емес, өзара құрмет пен ынтымақтың да көрінісі.
Фото: туризм және спорт министрлігі
Ең көп оқылған
