Қазақстан әйелдер бокс құрамасының бас бапкері Елдос Сайдалин 2026 жылға арналған дайындық жоспарын жариялады.
Оның айтуынша, басты мақсат – Азиада-2026 жарысына тыңғылықты дайындық.
Бапкердің мәліметінше, ұлттық құрама желтоқсан айында Түркістан облысында 21 күндік оқу-жаттығу жиынын өткізіп жатыр. Бұл кезеңде спортшылардың жалпы дене дайындығын жақсарту мен күш-қуатын арттыруға басымдық берілген.
«Қыркүйекте өтетін Азия ойындары – әйелдер құрамасы үшін алдағы ең маңызды старт. Сондықтан 2026 жыл бойғы барлық турнирлер мен оқу-жаттығу жиындары Азиадаға апарар дайындық кезеңдері ретінде қарастырылады», – деді Елдос Сайдалин.
Айта кетейік, Азиада-2026 Жапонияның Айчи префектурасы мен Нагоя қаласында 19 қыркүйек пен 4 қазан аралығында өтеді.
Жаңа жылдың басында Қазақстан әйелдер құрамасы Алматы облысында кезекті оқу-жаттығу жиынын өткізуді жоспарлап отыр. Одан кейін команда Еуропада өтетін бірнеше халықаралық турнирге қатысады.
Еске сала кетейік, әйелдер құрамасының соңғы ірі жарысы – қыркүйек айында Ливерпульде өткен World Boxing әлем чемпионаты. Бұл турнирде Елдос Сайдалиннің шәкірттері 3 алтын, 1 күміс және 2 қола медаль жеңіп алды.
Қазақстан әйелдер құрамасы алдағы маусымда да халықаралық аренада жоғары нәтиже көрсетуге ниетті.
Фото: бокс федерациясы
