Жапония астанасы Токиода XXV жазғы Сурдлимпия ойындары мәресіне жетті. Қазақстан ұлттық құрамасы 8 алтын, 4 күміс және 13 қола медаль жеңіп алды, деп хабарлайды malimsports.kz.
Медаль саны бойынша ең үздік көрсеткішті сурдо дзюдо спортшылары тіркеді. Аталған спорт түрінен отандық спортшылар 5 алтын, 2 күміс және 4 қола медаль олжалап, барлығы 11 жүлдеге қол жеткізді. Осы нәтижемен Қазақстан дзюдошылары жалпыкомандалық есепте бірінші орын алып, тарихи әрі рекордтық жетістікке қол жеткізді. Бұл – еліміздің сурдо дзюдо тарихындағы ең жоғары нәтиже.
Балуандар да ел қоржынына бірнеше жүлде салды. Атап айтқанда, еркін күрес шеберлері 1 алтын, 1 күміс және 3 қола медальға қол жеткізсе, грек-рим күресінің өкілдері толық медаль жиынтығын (алтын, күміс және қола) еншіледі.
Жеңіл атлетикадан Қазақстан құрамасы 1 алтын және 1 қола медаль иеленді. Фаина Мейірманова биіктікке секіру сайысында 1,79 метр нәтижемен Сурдлимпиада чемпионы атанып, жарыстың рекордын жаңартты. Бұған дейінгі рекорд – 1,75 метр болатын. Оны 2013 жылы Болгарияда өткен Сурдлимпиадада Беларусь спортшысы Маргарита Хралко тіркеген еді.
Ұлттық құраманың қоржынына таеквондо шеберлері 3 қола медаль салса, үстел теннисінен ерлер командасы командалық есепте қола жүлдегер атанды.
Айта кетейік, XXV жазғы Сурдлимпия ойындары Жапония астанасы – Токиода өтті. Есту қабілеті бұзылған спортшылар арасында ұйымдастырылатын бұл беделді халықаралық дода төрт жылда бір рет өткізіледі. Байрақты бәсекеде 81 елден келген 3 000-ға жуық спортшы 21 спорт түрі бойынша 209 дисциплинада өзара мықтыны анықтады. Қазақстан құрамасынан 78 спортшы 8 спорт түрінен сынға түсті.
Фото: ҚР ТСМ
