Әлемге танымал актер Джеки Чан Италияның Милан–Кортина қалаларында өтетін қысқы Олимпиада ойындарының Олимпиада алауы эстафетасына қатысты.
Атақты актер Олимпиада факелін ежелгі Помпей қаласында алып жүрді. Бұл сәт көпшілік үшін ерекше әсер қалдырып, тарихи мекен мен әлемдік спорт мерекесін тоғыстырған символдық оқиғаға айналды.
Эстафетаны ары қарай Италия футболының аңыз ойыншылары – Фабио Каннаваро мен Чиро Феррара Неаполь қаласында жалғастырады. Ал жаңа жыл мерекесі күндері Олимпиада алауы Помпей аумағында уақытша аялдайды.
Айта кетейік, қысқы Олимпиада ойындарының ашылу салтанаты 6 ақпанда өтеді. Осы уақытқа дейін Олимпиада алауы Италияның 110 провинциясын қамтитын 12 мың шақырымдық жолды жүріп өтеді.
Олимпиада алауы эстафетасына Джеки Чан сынды әлемдік деңгейдегі жұлдыздардың қатысуы ойындардың беделін арттырып, халықаралық назарды одан әрі күшейте түсті.
