DAR Team бас бапкері Эдуард Базров ирландиялық жартылай орта салмақтың топ файтері Иэн Гэрри жайлы пікір білдірді, деп жазады malimsports.kz Sports.kz-ке сілтеме жасап.
Базров оның экс-чемпион Белал Мухаммедті жеңуін ерекше атап өтті.
Мен әрдайым Иэн Гэрри туралы айтып жүрмін — ол өте қатты өсіп келеді. Мен оны Катарда жақыннан көрдім. Өзіне сенімді, техникалық жағынан мықты, антропометриясы да керемет, ең бастысы - чемпионға тән мінез бар. Өте қызық спортшы. Гэрридің қалай жетіліп келе жатқаны анық көрінеді. Бұрынғы чемпионды жеңу – үлкен жетістік. Гэрри Белалды сабырлы түрде айқын жеңді. Жарайды, шыңға қарай сенімді қадаммен бара жатыр, - деді Базров.
Айта кетейік, қазіргі таңда Иэн Гэрри жартылай орта салмақ рейтингінде екінші орында тұр. Еске салсақ, былтыр желтоқсанда ол мансабындағы жалғыз жеңілісті Шавкат Рахмоновтан тапқан еді. Сол жекпе-жектен кейін Рахмонов октагонға қайта шыққан жоқ. Ал Гэрри сол жеңілістен кейін екі рет жекпе-жек өткізіп, мықты қарсыластарды жеңіп, қарқынды формаға енді.
Сәуірде ол Карлос Пратесті - қазіргі титулға үміткерлердің бірін - бір ауыздан шыққан шешіммен жеңді. Ал қарашада бұрынғы чемпион Белал Мухаммедті төрешілер шешімімен ұтты.
Бұған қоса, ирландиялық файтер бұған дейін UFC жартылай орта салмақ чемпионы Ислам Махачевке жекпе-жек өткізу туралы ұсыныс жасаған болатын.
Фото: Ашық дереккөзден
