Конькимен жүгіруден Солт-Лейк-Ситиде (АҚШ) өткен Әлем кубогының алғашқы кезеңі Қазақстан құрамасының олимпиадалық жолдамалар үшін күресін бастап берді, деп хабарлайды malimsports.kz.
Қазақстанның ұлттық Олимпиада комитетінің мәліметінше, еліміздің шорт-трек құрамасы бірнеше жоғары нәтиже көрсетіп, медаль жеңіп алып, бірнеше рекорд жаңартты. АҚШ-тағы Әлем кубогі кезеңінде спортшыларымыз 15 рет жеке рекорд орнатты, сонымен қатар төрт мәрте Қазақстанның жоғары нәтижесін жақсартты. Евгений Кошкин 500 метрлік қашықтықта әлемдік рекордқа бір қадам қалдырды және күміс медальге ие болды.
Кошкин 33,67 секундта мәреге жетті. Ол тек нидерландтық Йеннинг Де Буге жол берді — оның уақыты 33,63 секунд. Айта кетейік, осы қашықтықтағы әлемдік рекорд ресейлік Павел Кулижниковқа тиесілі, ол 2019 жылы 33,61 секунд көрсеткішін тіркеген еді. Демек, Кошкин де, Де Бу де тарихты жаңартуға жақын болды.
Алайда Калгаридегі (Канада) екінші кезеңде Кошкин медальге қол жеткізе алмады. Ол барлық қатысушылардың ішінде ең жылдам жүгіргендердің қатарында болды, бірақ қашықтықта қателік жіберіп, үздік үштікке енді. Дегенмен спортшының әлеуеті жоғары, ең бастысы – Херенвенде өтетін үшінші кезеңде үздік үштікке қайта оралу мүмкіндігі бар. Әлем кубогының жалпы есебінде Кошкин қазір 11-орында тұр.
Надежда Морозова да тұрақты өнер көрсетуде. АҚШ-та өткен 1000 метрлік жарыста ол 7-орынға тұрақтады. 1500 метрде В тобында өнер көрсетіп, Қазақстан рекордын жаңартты. А және В топтарын қоса есептегенде, ол барлық спортшылар арасында екінші нәтиже көрсетті.
Морозова 3000 метрде де үздік нәтиже көрсетті. Бұл қашықтықта да ол В тобында жүгіргендіктен, жүлдеге енген жоқ, бірақ тағы бір ұлттық рекорд орнатты. Маусым басында спортшы тұрақтылығы арқылы көзге түсіп, Әлем кубогының екінші кезеңінде ел рекордын қайталады. Сонымен қатар, командалық жарыста Қазақстан құрамасының рекорд жаңартуына үлес қосты.
Ұзақ үзілістен кейін оралған Мария Голубева да айтарлықтай нәтиже көрсетті. 3000 метрде В тобында төртінші орын алып, жекелей көрсеткішін 5 секундқа жақсартты. 1500 метрді де сәтті жүгіріп өтті, В тобында үшінші орынды иеленіп, масс-стартта жеңіске жетті.
Екінші кезеңде Кристина Силаева 500 метрде 8-орынға тұрақтады. Александр Кленко мен Арина Ильященко аралас эстафетада 7-орын алды. Әйелдер құрамасы да командалық із кесу жарысында 7-орынға ие болды.
Қазіргі таңда олимпиадалық жолдамалар үшін қызу бәсеке жалғасып жатыр. Әлі екі іріктеу кезеңі бар, содан кейін 2026 жылғы Олимпиада ойындарының қатысушылары анықталады. Әлем кубогының үшінші кезеңі 5–7 желтоқсанда Херенвенде (Нидерланды) өтеді. Қазақстан құрамасының басты міндеті – бар позицияны сақтау және кейбір қашықтықта нәтижені жақсарту. Отандастарымызды қызу бәсеке күтіп тұр.
Фото: ҰОК
