Қазақстан мен Пәкістан шахмат бойынша серіктестік орнатты

Қазақстан мен Пәкістан арасындағы шахмат саласындағы ынтымақтастық жаңа деңгейге көтеріледі, деп хабарлайды malimsports.kz. 

Қазақстан Президентінің Пәкістанға сапары шеңберінде Исламабадта осы күндері спорт және білім беру арқылы достықты нығайтатын іс-шаралар өтіп жатыр. Қазақстан шахмат федерациясы пәкістандық әріптестерімен белсенді түрде тәжірибе бөлісуде. Қазақстан мамандары жергілікті жастармен және ұлттық құрамамен жұмыс жүргізді. Осы орайда жаттығу мен турнирлер ұйымдастырды. Мұндай бастамалар зият пен инновацияны дамытуға деген ортақ қызығушылықты баса көрсетеді.

Сондай-ақ осы сапар аясында өткен «Қазақстан-Пәкістан» бизнес-форумында екі елдің бизнес және мемлекеттік құрылымдарының өкілдері бас қосты. Спикерлердің қатарында Freedom Holding Corp. CEO, сонымен қатар Қазақстан шахмат федерациясының президенті Тимур Турлов сөз сөйледі. Өз сөзінде ол сенімді нығайтудағы шахматтың рөлін атап өтті. Kazchess президенті спорттық жобалар экономикалық байланыстардың негізін қалайтынын атап көрсетті. 

«Пәкістанмен бірге шахматты бірнеше жылдан бері дамытып келеміз. Қазақстандық мамандар жергілікті жастармен, соның ішінде ұлттық құрама ойыншыларымен жұмыс жасап жатыр. Осы күндері Исламабадта біздің федерация дайындап, жабдықтаған заманауи шахмат сыныптары ашылуда. Бұл достығымыздың айқын көрінісі және Қазақстан мен Пәкістанның адами капитал мен болашақ ұрпақты дамытуға зор мән беретінінің белгісі. Сол күні өткен іскерлік форумда зият пен инновацияға деген сұранысты бизнес қоғамдастығы да толық қолдайтыны анық болды. Біздің елдерді жастар, «цифрға» деген сүйіспеншілік және көшбасшылыққа дайындық біріктіреді. Біз бір-бірімізді күшейте аламыз және мұны мемлекет басшыларының саяси еркі мен өзара сенімнің жоғары деңгейіне сүйене отырып жүзеге асырамыз», – деді Қазақстан Шахмат федерациясының президенті Тимур Турлов.

«Dostyq» спорт орталығында шахмат академиясының ашылуы ерекше оқиға болды. Айтулы іс-шараға Қазақстан шахмат федерациясының бірінші вице-президенті Дәрмен Сәдуақасов қатысты. Федерация үй-жайды жөндеу және жарақтау жұмыстарын өз мойнына алған болатын. Шахматтан сабақ өткізу үшін заманауи жабдық орнатты. Академияның ашылу рәсімінде бір жылға арналған бірлескен іс-шаралар жоспарына қол қойылды. Оған тренингтер, шеберлік сабақтары және турнирлер кірді. Сонымен қатар Дәрмен Сәдуақасов бір мезгілде ойнайтын шахмат сеансын өткізді. Пәкістан жастар құрамасының мүшелерімен ойнады. Мұндай кездесулер жас шахматшыларды шабыттандырады және олардың іс жүзіндегі шеберлігін көрсетеді. Бұл пәкістандық ойыншыларға тәжірибелі мамандардан тактика мен стратегияларды үйренуге мүмкіндік береді.

«Біз Пәкістан Шахмат федерациясымен олардың балалары Қазақстандағы жарыстарға келетін болып келістік. Өз тарапымыздан қазақстандық жаттықтырушыларды пәкістандық балалармен жұмыс істеуге жібереміз. Біздің балалар-жасөспірімдер құрамасы әлемдегі ең мықтылардың бірі саналады және біз тәжірибе бөлісуге дайынбыз. Мұнда зор әлеует бар: қазірдің өзінде жеті миллион бала шахматпен айналысады. Заманауи технологиялар мен іріктеу әдістемелерін енгізу қажет. Қазір бұл бастапқы деңгейде тұр», – деді Қазақстан шахмат федерациясының бірінші вице-президенті Дәрмен Сәдуақасов.

Фото: ҚР шахмат федерациясы