Қазақстан спортшылары Сауд Арабиясының Эр-Рияд қаласында өткен Ислам ынтымақтастығы ойындарындағы жарыстарын сәтті қорытындылады.
ҚР Ұлттық Олимпиада комитетінің мәліметінше, отандастарымыз жалпы есепте 56 медаль жеңіп алды.
Оның ішінде:
15 алтын,
20 күміс,
21 қола.
Осы нәтижемен Қазақстан жалпыкомандалық есепте жетінші орынға жайғасты.
Жүзу, ауыр атлетика және джиу-джитсу спортшылары ел қоржынына үш медальдан салса, үстел теннисінен екі алтын медаль олжаланған. Бұдан бөлек дзюдо, муай-тай, семсерлесу және карате өкілдері бір-бір алтыннан иеленді.
Қазақстандық атлеттер командалық сында да көзге түсті. Әйелдер құрамасы гандболдан финалға дейін жетіп, күміс медаль жеңіп алды.
Медаль кестесінде Түркия көш бастады - 72 алтын, 44 күміс, 39 қола.
Екінші орынға Өзбекстан (29 алтын, 35 күміс, 32 қола),
үшінші орынға Иран (29 алтын, 19 күміс, 33 қола) тұрақтады.
Айта кетейік, Қазақстан құрамасы бұл ойындарда 23 спорт түрінің 15-інде бақ сынаған 100-ден аса спортшымен қатысқан болатын.
Фото: ҰОК
