Қазақстандық мәнерлеп сырғанаушы Михаил Шайдоров жаңа олимпиадалық циклге дайындықты бастау үшін АҚШ-қа барды. Бұл туралы спортшы өзінің Instagram парақшасында хабарлады, деп жазады malimsports.kz.
Шайдоров АҚШ-тағы ең ірі мұз ареналарының бірі саналатын Калифорния штатындағы Great Park Ice кешенінің алдында түскен суретін жариялады.
«Қарбаласқа толы айды асыға күтіп жүрмін», – деп жазды спортшы.
Бүгін Туризм және спорт министрі Ербол Мырзабосынов Михаил Шайдоровпен жасалған келісімшартта 2030 жылғы Олимпиада ойындарында жүлде алу міндеті сақталғанын мәлімдеді.
«Келісімшарт – стандартты құжат. Біздің спортшылармен жасалатын барлық келісімдерде белгілі бір міндеттемелер қарастырылған. Бұл талаптар Олимпиада спортшыларына да, басқа деңгейдегі спортшыларға да бірдей қолданылады. Қазіргі уақытта Михаил Шайдоровтың командасы АҚШ-та дайындалып жатыр. Оқу-жаттығу жиыны шамамен екі айға созылады. Сонымен қатар келісімшартта қандай да бір қаржыны қайтару жөніндегі талаптар қарастырылмаған», – деді Ербол Мырзабосынов.
Айта кетейік, Михаил Шайдоров алдағы олимпиадалық циклде Қазақстан атынан өнер көрсетіп, 2030 жылғы Олимпиада ойындарына дайындалуда.
Фото: instagram.com/mikhail_shaidorov
