Ксения Балабаева – рапидтен әлем чемпионы!
Ксения Балабаева 2025 жылы 20 жасқа дейінгі жасөспірімдер арасында өткен рапид бойынша әлем чемпионатында жеңіске жетті, деп хабарлайды malimsports.kz.
Турнир Перу астанасы Лимада өтіп жатыр. 19 жастағы алматылық шахматшы 9 турдан кейін 7 ұпай жинады. Жарыс швейцар жүйесі бойынша 15+10 уақыт бақылауымен (әр ойынға 15 минут және әр жүріске 10 секунд қосылады) өткізілді. Балабаева екі күннен кейін 5 ұпаймен көш бастап тұрған. Жарыстың соңғы күнін Ксения 47-ші жүрісте мат қойған Умида Омонованы жеңумен бастады. Кейін Анна Журова және Афруза Хамдамовамен сенімді тең ойнап, 1-ші орынды алдын ала қамтамасыз етті.
Ксения Балабаева – 2024 жылы Будапештте өткен шахмат олимпиадасында күміс алған Қазақстанның ересектер арасындағы әйелдер құрамасының мүшесі. Қазақстан намысын бұл чемпионатта сондай-ақ Лия Құрманғалиева мен Әмина Қайырбекова қорғады. Амина 6 ұпай жинап 7-ші орынға ие болса, Лия 5 ұпаймен 12-ші орында мәреге жетті.
2025 жылғы әлем чемпионаты (рапид, G20)
1. WGM Ксения Балабаева (2287) – 7 ұпай;
2. WIM Афруза Хамдамова (2384, Өзбекстан) – 6½;
3. WFM Варвара Полякова (2065, FIDE) – 6½;
4. WFM Анна Журова (2189, FIDE) – 6½;
5. WIM Умида Омонова (2265, Өзбекстан) – 6;
6. FM Фиорелла Контрерас Уаман (2152, Перу) – 6;
7. WIM Әмина Қайырбекова (2259) – 6;
8. IM Элине Рёберс (2409, Нидерланды) – 6;
12. WGM Лия Құрманғалиева (2150) – 5.
26 қыркүйек – демалыс күні. 27–28 қыркүйекте блиц бойынша (3+2 форматы: партияға 3 минут және әр жүріске 2 секунд қосылады) 9 тур швейцар жүйесімен өтеді.
Фото: Спортты дамыту дирекциясы
Балауса Мұздыман "Қайрат" пен "Реал Мадрид" кездесуіне болжам жасады
Ең көп оқылған
