Инфантино Иран құрамасына әлем чемпионатында ең жақсы жағдай жасалатынын айтты

ФИФА Иран ұлттық құрамасының 2026 жылғы футболдан әлем чемпионаты турниріне қатысуы үшін барынша қолайлы жағдай қамтамасыз етеді, деп хабарлайды malimsports.kz. 

Бұл туралы ұйым президенті Джанни Инфантино N+ басылымына берген сұхбатында мәлімдеді (El Financiero келтіреді).

«Біз шынайы әлемде өмір сүріп жатырмыз және Иран құрамасының қандай қиын жағдайда екенін түсінеміз. Сондықтан олардың әлем чемпионатындағы матчтарын ең жақсы жағдайда өткізуі үшін жұмыс істеп жатырмыз», - деді Инфантино.

Оның айтуынша, ФИФА-да қосымша жоспарлар (B, C, D) жоқ, тек негізгі жоспар ғана бар.

«Біз күрделі геосаяси жағдайда өмір сүріп отырмыз. Бұл мәселелерді толық шешу біздің қолымыздан келмейді, бірақ біз әлемді біріктіріп, бейбітшілік пен мереке атмосферасын қалыптастыра аламыз», - деп атап өтті ол.

28 ақпаннан бастап АҚШ пен Израиль Иранға қарсы әскери операция жүргізіп келеді.

2026 жылғы футболдан әлем чемпионаты 11 маусым мен 19 шілде аралығында АҚШ, Канада және Мексикада өтеді. Иран құрамасы G тобына түсіп, Бельгия, Египет және Жаңа Зеландия командаларымен ойнайды. Топтық кезеңдегі матчтарын Лос-Анджелес пен Сиэтл қалаларында өткізуі жоспарланған.

Иранның спорт министрі Ахмад Доньямали 11 наурызда құраманың әлем чемпионатына бармайтынын айтқан болатын. Ал АҚШ президенті Дональд Трамп ирандық команданың келуін орынсыз деп санайтынын мәлімдеген.

Сонымен қатар, Иран футбол федерациясы «Америкаға бойкот жариялағанымен, әлем чемпионатына емес» екенін атап өтті. Команда өз матчтарын АҚШ-тың орнына Мексикада өткізу мүмкіндігін қарастырып отыр.

Фото: Getty Images