Бүгін Сурдлимпиада ойындарында жеңіл атлетикадан ұлттық құрама спортшылары ұзындыққа және биіктікке секіруден, сондай-ақ түрлі дистанцияға жүгіруден сынға түсуде, деп хабарлайды malimsports.kz.
Дене мүмкіндіктері шектеулі тұлғаларға арналған спорттық даярлау орталығының мәліметінше, қазақстандық Фаина Мейрманова биіктікке секіруден 1.79 м нәтижесін көрсетіп, Сурдлимпиада ойындарының рекордын жаңартып, чемпион атанды. Күміс жүлдені 1.76 м нәтижесімен бейтарап спортшы Анна Суравец иеленсе, қола медаль 1.67 м нәтижесін көрсеткен словакиялық Лейа Глонарикке бұйырды.
Фаина Мейрманова – жеңіл атлетикадан халықаралық дәрежедегі спорт шебері. Ол 2024 жылы Тайбэйде (Тайвань) өткен әлем чемпионатында биіктікке секіруден 176 см нәтижесін көрсетіп, 20 жасқа дейінгі спортшылар арасындағы әлемдік рекордты жаңартқан. Сондай-ақ 2024 жылғы Азия–Тынық мұхиты ойындарында ұзындыққа секіруден чемпион атанды. Фаинаның жасы – 19-да, ол Шығыс Қазақстан облысының тумасы. Спортпен шамамен жеті жыл айналысады.
Еске салсақ, Сурдлимпиада ойындарының алғашқы жарыс күнінде қазақстандық дзюдошылар ел қоржынына төрт медаль салған болатын: екі алтын және екі қола.
Фото: Дене мүмкіндіктері шектеулі тұлғаларға арналған спорттық даярлау орталығы
