Батырхан Төлеуғали мен Назым Махмутова Лахордағы Президент кубогы турнирінде топ жарды 

Пәкістанның Лахор қаласында өтіп жатқан таеквондодан G-3 санатына жататын дәстүрлі World Taekwondo Президенті кубогында Қазақстан командасының қоржынына 2 алтын медаль түсті, деп хабарлайды malimsports.kz.

Спортты дамыту дирекциясының баспасөз қызметінің мәліметінше, Назым Махмутова жартылай финалда Оңтүстік Корея өкілі Ох Сенгюді (2:0), финалда Сауд Арабиясының спортшысы Сабер Дунья Бушуайбтан басым түсіп, -73 кг салмақта алтыннан алқа тақты.
Ал отандасымыз Батырхан Төлеуғали (-87 кг) финалда Өзбекстан спортшысы Ёдгорбек Джурабоевты ұтып, жеңімпаз атанды. Батырхан бүгін жарыс барысында Оңтүстік Корея, Таиланд пен Өзбекстан өкілінен басым түсті.
Айта кетейік, осыған дейін Ұлттық құрама еншісінде 3 қола медаль болған. Бүгін Қазақстан жарысты 2 алтын, 3 қола жүлдемен аяқтады. Биыл додаға әлемнің 49 елінен 427 спортшы қатысты.

Фото: Спортты дамыту дирекциясы