2025 жылғы 5-12 желтоқсан аралығында Алматыда классикалық шахматтан Қазақстан Балалар кубогының финалы өтеді, деп хабарлайды malimsports.kz.
Нокаут жүйесі бойынша өтетін жарысқа 9-14 жас аралығындағы 16 бозбала мен қыз қатысып, үздік ойыншылар анықталады
Алдын ала 6 кезең қорытындысы бойынша әр жас санатында – 10 жасқа дейінгі және 14 жасқа дейінгі бозбалалар мен қыздар үшін 1-орыннан (20 балл) 15-орынға дейін (1 балл) ұпайлар берілді. Осы ұпайлардың қосындысы бойынша негізгі 16 қатысушы іріктелді: 14 жасқа дейінгі үздік 10 бозбала мен қыз, 10 жасқа дейінгі үздік 5 ойыншы және 2024 жылғы Қазақстан Балалар Кубогының жеңімпазы. Егер негізгі қатысушылардың бірі қатыса алмаса, оның орнына қосалқы тізімдегі келесі ойыншы өтті.
Әр кезеңде – 1/8 финал, ширек финал, жартылай финал және финал матчтарында қарсыластар фигуралардың түсін ауыстырып, 90+30 классикалық уақыт бақылауымен екі партиядан ойнайды: әр партияға 90 минут беріледі және әр жүріс үшін 30 секунд қосылады.
Екі классикалық партия тең аяқталса, жеңімпазды анықтау үшін тай-брейк өткізіледі: алдымен екі рапид партия (15+10), одан кейін екі блиц партия (3+2) ойналады. Егер нәтиже әлі тең болса, «армагеддон» партиясы ұйымдастырылады. Онда ақ фигурамен ойнайтын шахматшыға 4 минут беріледі, ал тең жағдайда қаралар жеңімпаз болып есептеледі. Фигураның түсін ойындағы жеребе анықтайды.
Қазақстан Балалар Кубогының әр финалы (қыздар мен ұлдар арасындағы) үшін жүлде қоры – 1,5 млн теңге. Ол былай бөлінеді: 1-ші орын – ₸300 000, 2-ші орын – ₸200 000, 3-ші орын – ₸150 000, 4-ші орын – ₸130 000, 1/4 финалда жеңілген 4 ойыншыға – ₸80 000, 1/8 финалда жеңілген 8 ойыншыға – ₸50 000.
Финалда жеңімпаз болған бозбалалар мен қыздар KazChess/KCF атынан 2026 жылғы жасөспірімдер арасындағы әлем чемпионаттарына қатысу құқығын алады: World Cadets Chess Championship – U8–U12, World Youth Chess Championship – U14–U18.
2023 жылы Балалар Кубогының финалы алғаш рет нокаут жүйесі бойынша өткізілді. Сол турнирде Ақылжан Мейірханұлы (Қызылорда облысы) мен Әсия Асылхан (Түркістан облысы) жеңімпаз атанып, келесі жылы өткен турнирде де жеңісті сақтап қалды.
Фото: KazChess
