2016 жылғы Олимпиаданың қола жүлдегері, Қазақстан ұлттық олимпиада комитеті Спортшылар комиссиясының мүшесі Эльмира Сыздықова «Адами капитал – мемлекет дамуының негізі» атты панельдік талқылауға қатысты, деп хабарлайды malimsports.kz.
Іс-шара барысында тәжірибелі спортшы Астана және Алматы қалаларындағы студенттер алдында спикер ретінде сөз сөйледі.
Эльмира Сыздықованың айтуынша, әр адам өз ісінен қанағат табуы тиіс және тек бір мамандықпен шектелмей, жан-жақты дамуға ұмтылғаны жөн.
«Адамның өзін тұлға ретінде дамытуға салған инвестициясы – мықты қоғам мен қуатты мемлекеттің негізі. Спорттағы көпжылдық тәжірибем маған маңызды бір қағиданы ұқтырды: қандай қиындықтар мен сәтсіздіктерге қарамастан, алға қойған мақсаттан бас тартпау керек. Егер нақты мақсат айқын болып, соған табандылықпен ұмтылсаң, нәтижеге қол жеткізуге болады», – деді ол.
Айта кетейік, панельдік талқылауға қоғам қайраткерлері де қатысып, жиын барысында жастардың ел дамуына қосатын үлесі, сондай-ақ оларды белсенді азаматтық ұстанымға, кәсіби және жеке дамуға ынталандыру мәселелері талқыланды.
Фото: ҰОК
