ӘЧ-2026: Жанкүйерлер есінде қалған ең шулы жанжалдар

2026 жылғы футболдан әлем чемпионаты тартысты матчтармен ғана емес, түрлі дау-дамайлармен де есте қалды. АҚШ, Канада және Мексикада өткен мундиаль барысында ұйымдастыру, төрешілік және қауіпсіздік мәселелері қызу талқыланды, деп хабарлайды malimsports.kz. 

Визалық қиындықтар

Сомалиден келген төреші Омар Артан АҚШ-қа кіре алмай, турнирден шет қалды. Сонымен қатар бірқатар жанкүйерлер мен футбол шенеуніктері де виза алуда қиындықтарға тап болды.

Қатаң қауіпсіздік тексерістері  Өзбекстан, Сенегал және Уругвай құрамалары АҚШ-та ұзақ тексерулерден өтіп, кейбірі жоспарланған уақыттан кеш жетті. Бұл ұйымдастырушыларға қатысты сынның күшеюіне себеп болды.

Англия құрамасының заттары ұрланды. Команданың жабдықтары тасымалданып жатқан көліктен шамамен 18 мың доллар тұратын заттар қолды болды. Кейін олардың басым бөлігі табылып, командаға қайтарылды.

Испан тіліне қатысты дау

Баспасөз мәслихаттарында журналистерге испан тілінде сұрақ қоюға алғашқыда тыйым салынды. Қоғамның сынынан кейін ФИФА ережені өзгертіп, барлық баспасөз мәслихатында испан тіліндегі аударманы қамтамасыз ететінін мәлімдеді.

VAR төрешісінің ишарасы. Австралиялық VAR төрешісі Шон Эванстың телетрансляция кезінде көрсеткен ишарасы әлеуметтік желіде қызу талқыланып, кейбір ұйымдар оны нәсілшілдікке қатысты белгі деп бағалады.

Иран құрамасының қиын жағдайы. Саяси ахуал мен визалық шектеулерге байланысты Иран құрамасы АҚШ-та тұрақты орналасуға мүмкіндік алмай, әр матчтан кейін Мексикаға қайта оралып отырды.

«Келісілген» тең ойындар

Топтық кезеңнің соңғы турында Австралия - Парагвай, Жапония - Швеция және Алжир - Аустрия матчтарындағы тең нәтижелер жанкүйерлер арасында күмән туғызып, «келісілген ойын» деген пікірлер айтылды.

Аргентина мен Мессиге болысу туралы сын. Турнир барысында әлеуметтік желілерде «VARgentina» атауы кең тарады. Көпшілік төрешілердің бірнеше даулы шешімі Аргентина құрамасының пайдасына шыққанын айтып, ФИФА-ны Лионель Мессиге қолдау көрсетті деп айыптады.

Балогунның дисквалификациясы

АҚШ құрамасының шабуылшысы Фоларин Балогунның қызыл қағазынан кейінгі дисквалификациясының күтпеген жерден күшін жоюы турнирдегі ең үлкен даулардың біріне айналды. Бұл шешім ФИФА тарихындағы бұрын-соңды болмаған оқиға ретінде бағаланды.

Англияның даулы голы 

Норвегиямен өткен ширек финалда ағылшындардың алғашқы голы алдында доптың камера тросына тигені жөнінде дау шықты. Алайда ФИФА арнайы датчиктің мәліметіне сүйеніп, доп тросқа тимегенін мәлімдеп, голды заңды деп таныды.

Осылайша, 2026 жылғы әлем чемпионаты жоғары деңгейдегі футболмен қатар ұйымдастырудағы кемшіліктері, төрешілердің даулы шешімдері және түрлі жанжалдарымен де есте қалды.

Фото: Getty Images