Қазақстандық пара дзюдошылар әлемдік Гран-приде 6 медаль жеңіп алды
Қазақстан құрамасы Бразилияның Сан-Паулу қаласында өткен көру қабілеті зақымданған спортшылар арасындағы пара дзюдодан әлемдік Гран-приде табысты өнер көрсетті, деп хабарлайды malimsports.kz.
Отандастарымыз жарысты 3 алтын және 3 күміс медальмен аяқтап, жалпыкомандалық есепте екінші орынға ие болды. Бірінші орынды 6 алтын, 3 күміс және 4 қола медаль еншілеген Бразилия құрамасы иеленсе, үздік үштікті 2 алтын және 1 күміс жүлдесі бар Украина түйіндеді.
Қазақстан құрамасы сапында J2 санатында сынға түскен Ибрахим Нұрмаханұлы (70 кг), Бексұлтан Қалмұрза (81 кг) және Жұрқамырза Шүкірбеков (+95 кг) чемпион атанды.
Ал Альфия Тлекқабыл (J1, 52 кг), Аяла Мереке (J2, 70 кг) және Ерлан Өтепов (J2, +95 кг) күміс жүлдеге қол жеткізді.
Қазақстан құрамасының бас бапкері Жандос Қияновтың айтуынша, бұл турнир Лос-Анджелес-2028 Паралимпиадасына жолдама беретін рейтингтік ұпайлар үшін маңызды жарыстардың бірі болды.
Айта кетейік, пара дзюдодан әлемдік Гран-при 10-11 шілде аралығында өтті. Байрақты бәсекеде 21 елден 100-ден астам спортшы бақ сынады.
Фото: Дене мүмкіндіктері шектеулі тұлғаларға арналған спорттық даярлау орталығы
"Мбаппеге үлкен соққы": Моуринью "Реал Мадридтің" танымал ойыншысын сатуға ниетті
Ең көп оқылған
