Шотландиялық «Хартс» клубының бас бапкері Дерек МакИннес қазақстандық футболшы Ислам Чесноковтың командаға ауыспай қалуы мүмкін деген ақпаратқа таңғалғанын айтып, жағдайды түсіндірді.
«Бұл қауесеттер қайдан шыққанын білмеймін. Тек болжам жасай аламын, бірақ біздің тарапымыздан ештеңе өзгерген жоқ. Біз Исламның агенттерімен тұрақты байланыстамыз, келесі аптаға жоспарланған қоңырау да өз кестесінде тұр», - деді бапкер.
МакИннестің айтуынша, клуб Чесноковты желтоқсан айында күтуде, ал жұмыс визасын рәсімдеу процесі соңғы кезеңге жеткен.
«Біз оның желтоқсанда командамен бірге жаттығуын қалаймыз. Содан кейін ол Рождество мерекесіне орай үйіне барып, қаңтарда қайта оралып дайындықты бастайды», - деп түсіндірді ол.
Бапкер сондай-ақ клубтың трансферді жазғы ауысу терезесінде-ақ аяқтағысы келгенін, бірақ ойыншыны күту туралы шешім қабылдағанын айтты.
«Ол бізбен келісімшартқа қол қойды. Ислам да, оның агенттері де қаңтарды асыға күтіп отырғанын бірнеше рет айтты. Сондықтан біз бұл тұрғыда толықтай сабыр сақтап отырмыз», - деді МакИннес.
Сонымен қатар ол Чесноков ойнайтын позицияның команда үшін аса маңызды екенін атап өтті:
«Мен Исламмен жұмыс істеуді асыға күтемін. Бұл біз басынан бері басымдық беріп келе жатқан негізгі позициялардың бірі. Біз оны өткен трансферлік терезеде алғымыз келген, бірақ процесс біраз күрделі болды. Енді барлық рәсімдер аяқталуға жақын. Алдын ала келісімшарт бар кезде, ойыншының келетініне сенімді боласың», - деп қорытындылады бапкер.
Фото: КФФ©
