Төрт әлем чемпионатына қатысқан Мексика құрамасының қақпашысы мансабын аяқтады
Мексика құрамасының қақпашысы Гильермо Очоа кәсіби футболдағы мансабын аяқтағанын мәлімдеді. Бұл туралы тәжірибелі голкипер өзінің X әлеуметтік желісіндегі парақшасында хабарлады, деп жазады malimsports.kz.
«Арманымның мені қайда жетелейтінін ешқашан елестеткен емеспін. Бүгін өткен жолыма мақтанышпен қарап, тек алғыс айта аламын. Отбасыма, командаластарыма және әрдайым қолдау көрсеткен жанкүйерлерге рақмет. Миллиондаған адамның махаббатын және Мексика үшін барымды салғаныма деген ішкі тыныштықты өзіммен бірге алып кетемін. Біз бірге бастан өткерген сәттер ешқашан ұмытылмайды. Баршаңызға шын жүректен алғыс», - деп жазды Очоа.
41 жастағы қақпашы футбол тарихында алты әлем чемпионатының құрамына енген санаулы ойыншылардың бірі атанды. Ол бұл көрсеткіш бойынша Лионель Месси мен Криштиану Роналдумен қатар тұр. Очоа 2006 және 2010 жылғы әлем чемпионаттарына Мексика құрамасының өтініміне енгенімен, алаңға шыққан жоқ. Ал 2014, 2018, 2022 және 2026 жылғы дүниежүзілік додада 12 матч өткізіп, ұлттық құраманың негізгі қақпашысы болды.
Мексика құрамасы сапында Очоа 154 матчқа қатысып, КОНКАКАФ-тың Алтын кубогын алты рет жеңіп алды. Сондай-ақ ол 2021 жылы Токиода өткен Олимпиада ойындарының қола жүлдегері атанды.
Клубтық мансабында Гильермо Очоа Мексиканың «Америка», Францияның «Аяччо», Бельгияның «Стандард», Испанияның «Малага» және «Гранада», Италияның «Салернитана», Португалияның «Авеш» және Кипрдің АЕЛ клубтарының намысын қорғады. Очоа ұзақ жылдар бойы Мексика футболының символына айналып, әлем чемпионаттарындағы жарқын ойындарымен жанкүйерлердің есінде қалды.
Фото: Getty Images
"Мбаппеге үлкен соққы": Моуринью "Реал Мадридтің" танымал ойыншысын сатуға ниетті
Ең көп оқылған
