«Тобыл» Еурокубоктағы жорығын аяқтады

Қостанайдың «Тобылы» Конференция лигасының үшінші іріктеу кезеңіндегі қарымта матчта өз алаңында Сербияның «Партизан» клубынан жеңіліп қалды, деп хабарлайды malimsports.kz.

Кездесудің алғашқы минуттарынан-ақ қазақстандық команда бастаманы өз қолына алуға тырысты. Қос қанат арқылы жиі шабуыл ұйымдастырған «Тобыл» 7-минутта есеп ашты. Ислам Чесноков мүмкіндігін сәтті пайдаланып, командасын алға шығарды.

Екінші таймның басында сербиялық клуб таразы басын теңестірді. 47-минутта Стефан Митрович есепті 1:1-ге жеткізді. Ал негізгі уақытқа қосылған 2-минутта Чака Траоре «Партизанға» жеңіс әкелген голды соқты.

Осылайша, «Тобыл» өз алаңында 1:2 есебімен жеңіліп, Конференция лигасындағы еурокубок жолын аяқтады. Ал алғашқы кездесуде қостанайлықтар сербиялық клубқа 0:3 есебімен жол берген болатын.

«Партизан» плей-офф кезеңінде Испанияның «Хетафе» клубымен кездеседі.

Айта кетейік, «Тобыл» екінші іріктеу кезеңінде Литваның «Паневежис» командасын екі матчтың қорытындысы және пенальти сериясы бойынша (1:1, 2:2, пенальтиден – 3:2) жеңген еді.

Қазақстанның еурокубоктағы жалғыз өкілі ретінде Чемпиондар лигасында өнер көрсеткен алматылық «Қайрат» та үшінші іріктеу кезеңінде жарысты жалғастыра алмады. Алматылық клуб Черногорияның «Сутьеска» (2:1, 2:0) және Кипрдің «Омония» (1:0, 0:1, пенальтиден – 6:5) командаларын жеңгенімен, үшінші кезеңде Болгарияның «Левски» клубына екі матчта да 0:1 есебімен есе жіберді.

Фото: "Тобыл" ФК