Қазақстан футбол федерациясы қазақстандық төреші Татьяна Сорокопудованың әйелдер арасындағы УЕФА төрешілерінің бірінші санатына өткенін мәлімдеді, деп хабарлайды malimsports.kz.
Бұл шешім арбитрдің кәсіби деңгейінің айтарлықтай өскенін көрсетеді. Көпжылдық еңбегі, жүйелі дайындығы және ұлттық әрі халықаралық жарыстардағы тұрақты қызметі оның жоғары санатқа көтерілуіне негіз болды. УЕФА-ның бірінші санаты — жеке жетістік қана емес, сонымен қатар Қазақстандағы төрешілік институтының, әсіресе әйелдер төрешілігінің халықаралық аренадағы беделінің нығайып келе жатқанын аңғартады.
Осыған дейін Татьяна Сорокопудова УЕФА аясында бірқатар халықаралық матчтарға төрешілік жасап, ел ішіндегі жарыстарда да тұрақты түрде қызмет атқарып келді. Оның халықаралық кездесулерге тағайындалуы кәсіби дайындығының жоғары деңгейін және еуропалық стандарттарға толық сай екенін дәлелдейді.
Қазақстандық арбитрдің бірінші санатқа көтерілуі отандық төрешілер корпусы үшін маңызды қадам саналады. Бұл жетістік әйелдер футболындағы төрешілерді жүйелі түрде даярлау мен қолдаудың нақты нәтижесін көрсетеді.
Фото: ҚФФ
