Шухрат Ибрагимов «Тобыл» футбол клубының жаңа бас құрылтайшысы атанды
Қостанайдың «Тобыл» футбол клубының бас құрылтайшысы ауысты. Енді клубтың жаңа бас құрылтайшысы – Eurasian Resources Group (ERG) директорлар кеңесінің төрағасы әрі бас атқарушы директоры Шухрат Ибрагимов болды.
Бұл туралы Қостанай облысы әкімдігінің баспасөз қызметі хабарлады. Мәліметке сәйкес, бұл шешім Қазақстан Президенті Қасым-Жомарт Тоқаевтың кәсіби спортты коммерцияландыру жөніндегі тапсырмасы аясында қабылданған.Әкімдік мәліметінше, ірі және сенімді серіктестің қолдауы «Тобыл» клубының жаңа деңгейге көтерілуіне мүмкіндік береді.
Клубтың елдегі ірі тау-кен металлургия компанияларының бірі Eurasian Resources Group (ERG) қолдауына өтуі мемлекеттік қаржыландырудан біртіндеп бас тартудың белгісі ретінде қарастырылып отыр.
Бұл қадам футбол клубының тұрақты бизнес-моделін қалыптастыруға, жеке инвестиция тартуға және инфрақұрылымды дамытуға бағытталған.
Айта кетейік, «Тобыл» соңғы жылдары Қазақстанның ең табысты клубтарының бірі саналады және ел намысын еурокубок жарыстарында тұрақты түрде қорғап келеді. Жанкүйерлер жаңа өзгерістер командаға 2026 жылғы маусымда чемпиондық атақты қайтаруға көмектеседі деп үміттенеді.
39 жастағы Шухрат Ибрагимов – белгілі кәсіпкер, марқұм миллиардер Әліжан Ибрагимовтың ұлы.
Ол Eurasian Resources Group, «Еуразиялық қаржы компаниясы» және «Еуразия» сақтандыру компаниясы секілді ірі құрылымдарда жетекшілік қызметтер атқарады. Сонымен қатар Қазақстан Президенті жанындағы Шетелдік инвесторлар кеңесінің мүшесі.
Forbes деректеріне сәйкес, 2025 жылы Ибрагимовтар отбасының байлығы шамамен 2 млрд долларды құраған.
Фото: ERG
"Мбаппеге үлкен соққы": Моуринью "Реал Мадридтің" танымал ойыншысын сатуға ниетті
Ең көп оқылған
