ҚПЛ: «Жеңіс» пен «Оқжетпес» жеңімпазды анықтай алмады

Футболдан Қазақстан Премьер-лигасының 4-туры аясында елордалық «Жеңіс» пен көкшетаулық «Оқжетпес» өзара тең түсті.

Матч Астанадағы «Астана Арена» стадионында өтіп, 1:1 есебімен аяқталды.

Кездесудегі есеп 30-минутта ашылды. «Жеңіс» сапында грузиялық қорғаушы Зураб Тевзадзе мергендігімен көзге түсті. Алайда қонақтар матчтың соңына қарай таразы басын теңестіріп үлгерді. Екінші таймға қосылған қосымша уақыттың 94-минутында бразилиялық қорғаушы Лео Ассунсао гол соғып, командасын жеңілістен құтқарды.

Осылайша, қос команда бір-бір ұпайдан еншіледі.

Төрт тур қорытындысы бойынша «Оқжетпес» 8 ұпаймен турнир кестесінің 4-орнына жайғасты. Ал «Жеңіс» 3 ұпаймен 12-сатыда тұр.

4-турдың өзге матчтарының нәтижелері:

4 сәуір:

«Ертіс» – «Алтай» 1:0

«Елімай» – «Тобыл» 1:0

«Қайсар» – «Қызылжар» 0:0

«Ордабасы» – «Атырау» 1:1

5 сәуір:

«Ұлытау» – «Ақтөбе» 1:1

«Каспий» – «Жетісу» 0:1

«Қайрат» – «Астана» 4:0

Қазақстан Премьер-лигасының 5-туры 11-12 сәуір күндері өтеді.

Фото: «Оқжетпес» баспасөз қызметі