Қазақстанда доп теуіп жүрген футболшы әлем чемпионатында ойнады
«Астана» клубының жартылай қорғаушысы Иван Башич 2026 жылғы футболдан әлем чемпионатының топтық кезеңінде Канадаға қарсы матчта Босния және Герцеговина құрамасының сапында алаңға шығып, Қазақстан Премьер-лигасы тарихындағы ерекше жетістікке қол жеткізді.
Торонтода өткен кездесуде Башич негізгі құрамда ойын бастап, 61 минут өнер көрсетті. Ол қатысқан шабуылдардың бірінде босниялықтар есеп ашты. Матчтың 21-минутында Йово Лукич қарсылас қақпасын дәл көздесе, гол соғылған шабуылдың басталуына Иван Башич орындаған бұрыштама добы себеп болды.
Алайда екінші таймда Канада құрамасы таразы басын теңестірді. 78-минутта Кайл Ларин мергендік танытып, матч 1:1 есебімен аяқталды.
Осылайша Иван Башич әлем чемпионатының финалдық кезеңінде ойнаған Қазақстан Премьер-лигасының алғашқы футболшысы атанды. Бұл көрсеткіш қазақстандық клубтық футбол үшін тарихи оқиға саналады.
24 жастағы жартылай қорғаушы «Астана» сапына 2025 жылы қосылған. Қазіргі маусымда ол барлық турнирде 25 матч өткізіп, 3 гол соғып, 6 нәтижелі пас берген.
Әлем чемпионатының алғашқы турында Канада мен Босния және Герцеговина құрамалары бір-бір ұпайдан еншіледі. Келесі турда босниялықтар Швейцариямен кездессе, Канада Қатар құрамасына қарсы алаңға шығады.
Фото: ФК «Астана»
Бүгін қазақстандық клубтардың Еурокубоктағы алғашқы қарсыластары анықталады
Ең көп оқылған
