«Қайрат» тарихи матчта «Реалға» қарсы ойнап, ірі есеппен жеңілді
Алматылық «Қайрат» өз тарихында алғаш рет Чемпиондар лигасының топтық кезеңінде өз алаңында ойнады. Орталық стадионда өткен матчта қазақстандық клубқа мадридтік «Реал» қарсы тұрды, деп хабарлайды malimsports.kz.
Алғашқы минуттардан-ақ қонақтар алаң иелерінің қақпасына қысым көрсетті. 24-минутта «Қайраттың» 18 жастағы қақпашысы Шерхан Қалмырза айып алаңында аргентиналық Франко Мастантуоноға қарсы ереже бұзды. Нәтижесінде төреші пенальти белгілеп, оны Килиан Мбаппе сенімді орындады — 0:1.
Екінші таймда француз шабуылшысы өзінің шеберлігін толық көрсетті. 52-минутта ол қонақтардың жылдам шабуылын сәтті аяқтап, есепті еселеді — 0:2. Ал 74-минутта Арда Гүлердің әдемі пасынан кейін Мбаппе хет-тригін рәсімдеді — 0:3.
Кездесудің соңғы минуттарында мадридтік команда тағы екі мәрте мергендік танытты. 83-минутта Родригоның пасын Эдуарду Камавинга голға айналдырса, қосымша уақытта (93-минутта) Браим Диас нүкте қойды — 0:5.
Осылайша, «Қайрат» жанкүйерлерін нәтижемен қуанта алмады. Дегенмен Алматыдағы 22 мыңға жуық жанкүйер тарихи сәтке куә болып, әлемдік футбол жұлдыздарын өз көзімен көрді.
Бұл жеңістен кейін «Реал» 6 ұпаймен топтық кезеңнің көшбасшысына айналды. Еске сала кетейік, бірінші турда Хаби Алонсоның шәкірттері өз алаңында «Марсельді» 2:1 есебімен жеңген болатын. Ал «Қайрат» сырт алаңда «Спортингке» 1:4 есебімен жол берген еді.
Алдағы турларда алматылық клуб «Пафос» (Кипр), «Интер» (Италия), «Копенгаген» (Дания), «Олимпиакос» (Грекия), «Брюгге» (Бельгия) және «Арсеналға» (Англия) қарсы өнер көрсетеді.
Фото: УЕФА
Самат Смақов Шерхан Қалмырзаға эфирге шыға бермеуге кеңес берді
Ең көп оқылған
