«Қайрат» Чемпиондар лигасындағы жорығын жеңіспен бастады
Алматылық «Қайрат» UEFA Чемпиондар лигасының бірінші іріктеу кезеңіндегі алғашқы матчта Черногорияның «Сутьеска» клубын 2:1 есебімен жеңді, деп хабарлайды malimsports.kz.
Өз алаңында өткен кездесуде қазақстандық команда алғашқы минуттардан-ақ ойын тізгінін қолға алып, шабуылға көбірек көңіл бөлді. Дегенмен қонақтар қорғаныста сенімді ойнап, бірінші таймда есеп ашылған жоқ.
Үзілістен кейін де «Қайрат» басымдықты сақтап қалды. Матчтың 76-минутында бразилиялық қорғаушы Лукас Африко мергендік танытып, алаң иелерін алға шығарды.
Алайда негізгі уақыттың аяқталуына аз қалғанда, нақтырақ айтсақ 90-минутта Марко Мрвальевич есепті теңестіріп, «Сутьескаға» үміт сыйлады.
Соған қарамастан алматылықтар жеңісті уыстан шығармады. Қосымша уақыттың үшінші минутында Марк Гуаль шешуші голды соғып, «Қайратқа» 2:1 есебімен жеңіс сыйлады.
Осылайша, қазақстандық клуб Чемпиондар лигасының іріктеу кезеңін жеңіспен бастап, қарымта матч алдында басымдыққа ие болды. Командалар арасындағы жауапты кездесу 15 шілдеде Черногорияда өтеді.
Фото: "Қайрат" ФК
"Мбаппеге үлкен соққы": Моуринью "Реал Мадридтің" танымал ойыншысын сатуға ниетті
Ең көп оқылған
