Месси әкесі қайтыс болғаннан кейін алғаш рет матч өткізді
Аргентина құрамасы мен Солтүстік Американың Major League Soccer (MLS) клубы «Интер Майами» шабуылшысы Лионель Месси әкесі Хорхе Месси қайтыс болғаннан кейін алғаш рет матчқа қатысты, деп жазады malimsports.kz.
«Интер Майами» өз алаңында Лига кубогы аясында мексикалық «Леонға» 2:3 есебімен жол берді. Месси кездесудің екінші таймында алаңға қосалқы құрамнан шықты. Алайда нәтижелі әрекетімен көзге түсе алмады.
Хорхе Месси 8 тамызда 68 жасында ұзақ уақытқа созылған аурудан кейін Росарио қаласындағы ауруханада қайтыс болған. Онымен қоштасу рәсімі 9 тамызда Росариода жабық форматта, қауіпсіздік шаралары күшейтілген жағдайда өтті. Месси рәсімге қатысу үшін «Монтеррейге» қарсы Лига кубогы матчына (1:2) қатыспаған.
12 тамызда Месси әкесіне арнап жүрек тебірентерлік жазба жариялады. Ол әкесінен айырылғаннан кейін футболдағы мансабын ұзақ уақыт жалғастыра алатынына күмән келтіретінін айтқан.
Месси 2023 жылдан бері «Интер Майами» сапында өнер көрсетіп келеді. 2025 жылы клубпен бірге MLS чемпионы атанды. Сол жылдың қазан айында аргентиналық футболшы америкалық командамен келісімшартын 2028 жылдың соңына дейін ұзартқан.
39 жастағы Месси – «Алтын допты» сегіз рет жеңіп алған, футбол тарихындағы ең көп жүлде иеленген ойыншылардың бірі. Ол 2022 жылғы әлем чемпионы, Чемпиондар лигасының төрт дүркін жеңімпазы және Испанияның 10 дүркін чемпионы.
«Интер Майами» үш матчтан кейін үш ұпай жинап, плей-оффқа шығу мүмкіндігінен айырылды. Ал «Леонның» үш ойыннан кейін тоғыз ұпайы бар. Лига кубогының ширек финалына шығатын командалар топтық кезеңнің барлық матчтары аяқталғаннан кейін, 13 тамызда анықталады.
Фото: Getty Images
Месси әкесі қайтыс болғаннан кейін алғаш рет матч өткізді
Ең көп оқылған
