Лука Модрич болашағына қатысты шешім қабылдады
Италияның «Милан» клубы мен Хорватия құрамасының жартылай қорғаушысы Лука Модрич мансабын жалғастыруға ниетті.
La Gazzetta dello Sport басылымының мәліметінше, 2018 жылғы «Алтын доп» иегері әзірге кәсіби футболмен қоштасуды ойламай отыр. Дереккөзге сенсек, тәжірибелі хавбек мансабын «Милан» сапында жалғастыруға бейім. Сонымен қатар клуб та оның тәжірибесі мен көшбасшылық қасиетіне сенім артып отыр. Бұл маусымда Модричтің команда үшін маңызды ойыншылардың біріне айналғаны да айтылуда.
Бұған дейін хорватиялық ардагердің бұрынғы клубы – Загребтің «Динамосына» оралуы мүмкін екені туралы ақпарат тараған болатын. Кейбір басылымдар тіпті мұндай нұсқа 2026 жылғы әлем чемпионатынан кейін қарастырылуы мүмкін екенін жазды. Алайда соңғы мәліметтерге қарағанда, Модричтің қазіргі басымдығы – «Миланда» қалу.
Лука Модрич «Милан» клубына 2025 жылдың жазында мадридтік «Реалдан» еркін агент ретінде ауысты. Ресми мәлімет бойынша, оның келісімі 2026 жылдың 30 маусымына дейін жасалған және тағы бір маусымға ұзарту мүмкіндігі бар.
Қазір 40 жастағы футболшы жоғары деңгейде өнер көрсетуді жалғастырып келеді. Италияның баспасөзінің жазуынша, «Милан» басшылығы да ойыншының клубта тағы кемі бір маусым қалуына мүдделі. Дегенмен оның болашағына қатысты түпкілікті шешім әлі ресми түрде жарияланған жоқ.
Фото: «Милан» клубының баспасөз қызметі
Карло Анчелотти Неймарды тағы да Бразилия құрамасына шақырмады
Ең көп оқылған
